Tema 6: Dossier

Tras un novo tema, neste caso o tema 6 As programacións didácticas vixentes da materia de As linguas estranxeiras no contexto nacional e internacional,  impartido polo docente Gonzalo Constenla Bergueiro, dispóñome a realizar unha recompilación das actividades que levamos a cabo ao longo destas sesións coa súa correspondente reflexión.

• Debate piramidal

Durante a primeira sesión adicada a este tema, realizamos unha actividade de debate piramidal -que xa empregaramos con anterioridade no desenvolvemento do tema 5. En primeiro lugar tivemos que botar unha ollada aos diferentes elementos que deben comportar as programacións didácticas segundo o punto 3 do Artigo 24 no Capítulo V da Resolución do 11/05/2018 pola que se ditan instrucións no curso académico 2018/2019 para a implantación do currículo da ESO e do bacharelato nos centros docentes da Comunidade Autónoma de Galicia, escollendo de forma individual aqueles tres que consideraramos máis esenciais. Unha vez tomada unha decisión, xuntámonos en grupos de catro persoas e realizamos unha reflexión conxunta para escoller esta vez entre 4 e 5 elementos. Finalmente, compartimos entre todos as nosas ideas e o por que das nosas decisións, o que puxo en evidencia a grande ambigüedade e variedade de opinións en canto a como debería ser unha programación didática e polo tanto que é realmente este documento. Esta actividade non só nos permitiu cuestionar o que aprenderamos e deramos por feito en materias anteriores como Deseño Curricular onde entramos en contacto por primeira vez coas programacións, senón que tamén nos axudou a reformular eses coñecementos de forma colaborativa e moito máis estable para poder construir sobre eles a nova aprendizaxe.

• Análise das programacións didácticas

Nos últimos minutos desta primeira sesión, aproveitamos para procurar por grupos unha programación didáctica real dun centro educativo galego de secundaria ou de formación profesional a través da seguinte páxina web, que analizaríamos o luns seguinte tomando nota de diversos aspectos coma os principais apartados, as fontes de información, os contidos e elementos de cada apartado, así como calquera aspecto que chamase a nosa atención. Desafortunadamente, non estiven presente na sesión correspondente a esta actividade, polo que me servín das presentacións de Powtoon -ferramenta que descoñecía- elaboradas polos meus compañeiros e subidas á plataforma YouTube para poñerme ao día para a seguinte sesión. Os comentarios realizados polos meus compañeiros a cada unha das presentacións tamén me serviron de grande utilidade para comprender mellor en que aspectos debía facer máis fincapé. 

• Elaboración dunha unidade temática

Para finalizar o tema, e poñer en práctica a estrutura sobra a que refleionamos e debatimos nas sesións anteriores, elaboramos por parellas unha unidade temática que podedes consultar aquí arriba, seguindo unha plantilla de Genial.ly -ferramenta que empregáramos tamén con anterioridade. Durante esta actividade, a miña compañeira Cecilia e máis eu fixemos un esforzo imaxinativo deseñando un tema titulado Eating Out, para o que tivemos que establecer uns obxectivos, unha temporalización, decidir competencias e contidos, deseñar actividades, recoller unhs criterios de avaliación e uns mínimos esixibles, así como os instrumentos de avaliación e recursos a empregar. O traballo por parellas para actividades que requiren certa imaxinación sempre é difícil polo feito de que as ideas propostas e a forma de ver a actividade adoitan ser dispares, pero ao mesmo tempo é moi gratificante, especialmente cando se acada unha dinámica de traballo ben coordinada.